حكاية شجرة التين الشوكي

كان يا ما كان .......كان فى بستان جميل وبالاشجار المزهرة الناضرة مليان
الكل فية سعيد وفرحان
الا .....شجرة وحيدة حزينة وقلبها من الحزن زعلان
هى شجرة مش زى باقى الاشجار
شكلها مختلف ....اوراقها مختلفة وخالية من الازهار
هى شجرة التين الشوكى
جذعها بالشوك مليان
وورقها غليظ وقاسى
كل يوم الشمس تشرق على البستان
وتلالى على اوراق اشجار البستان
وفى الشروق والغروب
الشمس تلمح شجرة التين الزعلانة
وفى يوم من الايام ...الشمس قررت تسال شجرة التين الشوكى عن سبب وجومها وغضبها

وكان الرد هو :افرح لية ؟شايفة شكلى اية ؟
شيفانى وحيدة ازاى ؟
حتى ظلى لا نفع فية
مين يقدر يقعد تحتى
مين يقدر يلمسنى
شوفى اشجار البستان
كلها بالزهر مزدان
وانا اوراقى غريبة وعجيبة
شكلى مخيف وقبيح
تفتكرى اية ممكن يفرحنى ؟

ولان الشمس حنونة وعطوفة
فكرت ازاى تسعد شجرتنا الحزينة
وبلمسة سحرية منها
نامت شجرتنا الحزينة نومة عميقة
وبلمسة تانية
حلمت شجرتنا بحلم غريب
حلمت بالاتى :

"صاحب البستان :اقوم من نومى بقى .....ادخل بستانى واطمن على اشجارى
يا سلام علية بستان ......يا جمال اشجارى شوفوا مبهجة ازاى ؟
اية دة ....الشجرة دة دايما عابسة على طول ....دة شىء مش معقول -طبعا يقصد شجرة التين الشوكى صاحبتنا -انا لازم اجيب فاسى من بكرة واقطعها من جدورها
وطبعا شجرتنا شايفة وسامعة .....
الشجرة :يا خبر حا يقطعنى من جدرى ومن ارضى حا يقلعنى .....اة يا حظى اة يا ويلى

-ومر من الوقت شوية وسمعت الشجرة صوت اقدام جاية -

الشجرة :ياترى دة مين ؟

-الشجرة لقت اللى جاى ولد صغير بيبكى -

الشجرة :مالك لية بتبكى وزعلان
الولد :انا زعلان ومنك غضبان
الشجرة :لية عملتلك اية ....اية ذنبى ؟
الولد :بسببك مش حاكل .....مش حالبس .....مش حا اتعلم
الشجرة :وانا مالى ...سيبنى فى حالى
الولد :ابويا حا يقطعك بكرة .....بكرة نهاية كل احلامى
الشجرة :حرام عليك تزود همى ......وانا مالى
الولد :ابويا حا يجيب فلوس منين يعلمنى او يأكلنى او يلبسنى انا واخواتى ؟
الشجرة حكايتك اية معايا .....احكيلى وفهمنى
الولد :ابويا كل يوم الصبح يملى منك قفص كبير من التين بتاعك
الشجرة :ايوة صحيح ....يظهر بيرمية ولا فين بيودية ؟
الولد :لا يا فالحة للسوق بيودية ....بيبيعة والناس اللى بتحبة بتشترية وبفلوسة بأتعلم وباكل وبألبس .....لما ابويا يقطعك ومن البستان يقلعك .....حا يبيع اية ؟
عبوسك وحزنك السبب ....ابويا من منظرك تعب ......لكن انا واخواتى حا نعمل اية ؟
الشجرة قالت لنفسها :معقول انا كدة مهمة وضرورية ....وناس كتير بتعتمد علية ؟لالا اكيد انا باحلم ....ولا باتوهم

وتانى يوم الصبحية ....الشجرة سمعت اقدام جاية .....صاحب البستان ومعاة الفاس اللعين

الشجرة قالت لنفسها: يا ويلى دة بجد بقى
البستانى حزين وزعلان وقال لنفسة بصوت عالى : والله حرام .....اقطع رزقى بايديا ....بس اعمل اية هى السبب اة لو تضحك ....اة لو تبتسم وتحس بية ؟
الشجرة :خلاص عرفت وفهمت .....خلاص حرمت .....كنت فاكرة ان وجودى زى عدمة ...كنت فاكراك بتكرهنى .....كنت خايفة ما يكونش لى لازمة .....يعنى اكمن شكلى ......
صاحب البستان :حرام عليكى ...دة انتى سبب رزقى وسعدى .....عمر ما كان الشكل مهم .....شايفة كل الشجر دة ....ما يسوى شىء عندى "

نرجع تانى لصاحبتنا الشمس الحنونة
بلمسة سحرية منها فاقت الشجرة من نومها

طلت الشمس عليها وسالتها :اية الاخبار .....يا ترى عرفتى وفهمتى وللدرس استوعبتى
الشجرة :عمرى ما حسيت زى النهاردة بقيمتى .....عرفت النهاردة انى الجمال جمال الصنيع ....والقلب الطيب البديع ......واجمل شىء فينا ....اننا نكون عون للى حولينا
انا ملكة جمال البستان .......انا ملكة جمال البستان
الشمس :شفتى الغروب قرب ....ولازم اسيبك دلوقتى وامشى .....الصبح حاجيلك بسرعة علشان اشوف بسمتك من بين البستان طلة
تصبحى على خير وسعادة
الشجرة :حاستناكى بكرة ......واوعدك عمرى ما حا تفارقنى السعادة

وتوتة توتة ......فرغت الحدوتة ......اتمنى تعجبكم

» حكاية وردة
» حكاية حبة القمح
» شجرة الاسبرين ............
» شجرة البولينيا
» شجرة الماغنوليا